القرآن الكريم - الرئيسية - الناشر - دستور المنتدى - صبر للدراسات - صبر نيوز - صبرالقديم - صبرفي اليوتيوب - سجل الزوار - من نحن - الاتصال بنا - دليل المواقع - قناة عدن
| عاجل |
| الجزيرة مباشر | الجزيرة | العربية | روسيا اليوم | بي بي سي | الحرة | فرانس 24 | المياديين | العالم | سكاي نيوز | عدن لايف |
|
آخر المواضيع |
 |
|
#1
12-22-2010, 02:06 AM
|
|||
|
|||
الجني وصاحب الجحملية طيرو النوم على الفريق أول الكوكني أبو مافيش من يرقدنا
بسم الله الرحمن الرحيم
السلام عليكم ورحمة الله وبركاته الجني وصاحب الجحملية طيرو النوم على الفريق أول الكوكني أبو مافيش بقلم الفريق أول الكوكني ابو مافيش طبعا انتم تعرفون آخونا الجني اتصل عليا الجني قال ياكوكني أش رائك نروح نخزن على ساحل أبين قلت له تم يا جني لكن كيف القات قال لي الجني القات نشتري من المنصورة المهم أنا قمت وضربت الفوطة والكشيدة ولبست الشميز المخطط ونزلت جلست في الحافة بالركن مراعي يجزع تاكسي من تاكسي الراحة وما جزعش أي تاكسي وأنا أرشح الدنيا حما وحر وقلت في نفسي كيف أخوانا الموجودين في السجون وجلست اتاحف امسح العرق بالمنديل مناديل حق زمان أكيد البعض يذكرها وكنت أشقر بعيني يمين ويسار اقنص الرايحه والواجية وجزعت واحده قالت لي مالك ياكوكني أش الشياكه هذه أش معك موعد أنا على نياتي على طول قلت لها ايوه معي موعد قالت ما تستحي على وجهك قده رجولك على القبر عادك تواعد قلت لها مالك يا بنت الناس أنا معي موعد مع صاحبي الجني قالت شل لك سجاده ومسبحة واجلس بالمسجد أحسن لك وبعدين ياكوكني أش من جني ما فيش احد في الحافة حقنا اسمه الجني ,, قلت له مالك الجني مش بالحافة عندنا الجني صاحبنا إلي يكتب في منتديات الضالع قالت ما اعرفش منتديات الضالع وما فيش معي انترنت في البيت شكلك رايح تهاوز يا شيبة وتقول رايح تقابل الجني عادنا كنت برد عليها وأقول لها بهاو زك أنتي لو في بي طافه للمهاوزة ولكن شفت التاكسي وأجي وأشرت له قلت لها بعدين برجع واهب لك القصة خلينا أشل التاكسي هذا وقف لي التاكسي وطلعت وقلت له شغل المكيف أنا فداء لك شوف قتلنا الحمى قال لي يا عاقل فين رايح فين تشتينا أوصلك قلت له بروح أقابل الجني قال لي مالك يا عاقل أش تتفاره عليا أش من جني فين تشتي تروح أو بنزلك وأشوف لك زبون ثاني قلت له يا ابني أنا مقصدك اتفاره عليك هذا واحد صاحبي اسمه الجني شوفه كاتب مشهور ما تعرفوش قال لا ولا سمعت فيه من قبل,, قال أنا أسف يا عاقل أنا فكرتك تتفاره عليا قلت له ما فيش مشكلة حبيبي وصلنا المنصورة الجني صاحبي مراعي لي جنب سوق القات قال حاضر من عيوني يا والد المهم مشينا وأنا شفت السواق شكله ضبحان وطفشان كنت بسالة أش في بك لكن قلت ما يقعش سؤال كذا من الباب للطاقة خلينا أول افتح معه هدرة ,, وسألته من فين انته قال لي أنا من خور مكسر وسألته كيف الشغل معك بالتاكسي قال الحمد لله يوم نروح حق الخصار ويوم نتسلف حق البترول ونتسلف الإيجار حق التاكسي من شان أسدد الرجال صاحب التاكسي من هناك ,, أنا أفتهم لي يوم قال لي صاحب التاكسي من هناك عرفت انه صاحب التاكسي مستثمر من صنعاء ,,, مشينا قليل وأنا أشوف الصور حق الفاتح علي مليان الكانبات وقلت با أشوف صاحبنا كيف معنا ولا معاهم قلت له شوف صور حبيب الشعب ابو احمد في كل كل كأنبه تصدق لو مش صوره فوق الكانبات كان سرقو الكانبات وباعوها حديد وأشوف صاحبنا هدى السرعة وقدنا وصلنا طريق خور مكسر يعني بعد سوق عدن بقليل يمكن مسافة كيلو متر من السوق والدنيا ظهر وحر وقال لي السواق بعد ما بداء يهدى السرعة قال اسمع يا عاقل شوف أنا ما ارتحت لك من أول ما وقفت لك اسمع يا عاقل انزل من السيارة قلت له مالك صلى على النبي تنزلنا هنا وسط الشمس بعدين اش سويت في بك تنزلنا هنا عيب عليك قال لي يا عاقل أقولك انزل او بنزل أسحبك وخلي حبيب الشعب ينفعك ,, انا ضحكت يوم قال لي خلي حبيب الشعب ينفعك وعلى طول طلعت كاست قلت له طيب افتح هذا قبل ما انزل من السيارة وأنا قدنا شليت معي كاست عبود خواجة على شان نشغله في سيارة الجني لأنه المرة الاولة خزنت في سيارة الجني وجاب لي الطفش كل الكاستات ألي معه حق هيفاء وهبي ونوال الزغبي وراغب علامة ,, قال لي اش الكاست هذا يا عاقل أقولك انزل قلت له اسمع كلامي وافتح الكاست وبيفتهم لك وقاتك عليا اليوم ولا تزعل ,, صاحبنا شل الكاست وشغله واشتغل حبيب الشعب عبود وحرك رأسه صاحبنا قال لي يا عاقل تلعب عليا أنا فكرتك معاهم قلت له حتى أنا فكرتك معاهم قال خلاص بوصلك وأنا أسف قلت له ألان اشتيك تقول لي مالك معصب اش في بك بعدين عيب عليك تنزلنا هنا وسط الحمى هذا ,, قال والله كنت بنزلك المصائب ألي نحن فيها كلها بسببكم انتم الشيوبة قلوبكم كل أبوها دود وعقارب سود ضيعتمونا وضيعتو بلد وألان جالسين تتباكو مثل الحريم ,, قلت له عيب اش تتباكو مثل الحريم اش الكلام هذا نحن رجال توقف على شنباتنا صقور وشوف معنا شنبات حتى لو انته تشوف شنبي محلوق لكن وقت الجد يطلع لعمك الكوكني شنب تطرح فوقه دبابة مع عشرين جندي قال لي الله يزيلك يا عاقل قلت له مالك ليش تدعى عليا حرام عليك ,, قال هو انته الكوكني ابو مافيش قلت له ايوة أش تعرفنا قال لا اسمع عنك قلت له الحمد لله يعني انا مشهور قال يا عاقل شوفنا ما انزلك قلت انا الحمد لله ,, قال بزقي بك من الطاقة قال مشهور ليش انته فيفي عبدة او نانسي عجرم قلت أش من نانسي عجرم واش من فيفي عبدة عيب عليك انا عمك الكوكني ,, قال شوف يا كوكني انتم الشيوبة يشتي لكم محرقه مثل ما سوى هتلر باليهود او يشتي لكم زبط ولطم إلى ان تفلت عليكم أطقم الأسنان الي ركبتوها وخلتكم تعرفون تتكلمون وتنطقون الحروف مثل الناس ,, صاحبنا حامي علينا نحن معشر الشيوبة قلت له اش رائك يا صاحبي بالحراك هذه الأيام ,, قال الحراك هذه الأيام زفت الزفت بسببكم الله لا يوفقكم ,, تفكرون أنفسكم ضحكتم على الرجال وفرقتم بينهم ,, قلت له شوف حبيبي انا ما ليش دخل اذا تقصد احد معين قول انا ما ليش دخل ,, قال كلكم الشيوبة يحتاج لكم حرق لأنكم حاقدين على بعضكم البعض وما فيكم ثقة في بعضكم البعض وقال كلام كبير مقدرش اقولة بصراحة خائف لو قراء الموضوع يجي صاحب التاكسي يذبحنا لأنه كان معصب واذا حصلنا كشفت بالهدارة كلها با يزعل مني وأنا مشتيش أكون شهيد سواق التاكسي ,, المهم دخلنا الخط البحري والجني يتصل قلت له لحضه حبيبي عن أذنك بجاوب على الجني ,, جاوبت على الجني وقال لي مالك ياكوكني فينك أنا لي نص ساعة مراعي لك قلت له يا جني اش قالو لك معي طيارة انتظر انا قدنا أخذت تاكسي أنجيز قال الجني راكب الراحة يا كوكني بالفين من كريتر الى المنصورة قلت له ايوه وعادنا با أشل حبه قات للسواق هدية من عندي ,, الجني يضحك ويقول لي من فين لك يا عاقل لا يكون بعت اللالي حقك ,, مثل قيادتنا باعت المبادئ والاتفاقيات ,, قلت له يا جني لما نتقابل با اشرح لك الموضوع قال لي طيب مع ألسلامه .. قفلنا الخط ورجعت لصاحبي صاحب التاكسي ,, قلت له أش رائك في بيان يافع وفي بيان الذنبة أش رائك نحن الشيوبة نعرف نلعب كسر وسدح ,, طبق بريك صاحبنا الى ان خرج طقم الأسنان حقي الين وصل بين رجولي ونحن قريب ألطلعه حق الجسر وأنا عادنا با أساله مالك خير أش في أشوفه فتح الباب وخرج يجري الى الجهة الي انا راكب فيها وفتح الباب قال لي يا كوكني با تخرج من السيارة بالطيب او أسحبك انا شفت الرجال معصب وخرجت بهدؤ قلت مشتيش مشاكل يالله اش الحماء هذا المهم نزلت وقال لي هات حق المشوار طلعت له الفين وهبيت له الألفين قال وهات حق القات انا بدون أي جواب طلعت له ألفين ثانية قال زيد الف انا اخزن بثلاثه الف هبيت له حق المشوار وحق القات وبعدننا من جنب الباب قال لي اسمع يا عاقل كمل المشوار مشي شوف قده قريب سوق المنصورة ,, انا ولا رديت كلمه كنت خائف لا يدهفنا للبحر وانا معرف اسبح ,, راح وركب السيارة ونزل الزجاج قال لي يا عاقل الكاست با اشلة كمان قلت له لو تشتي المشدة حقى با اهب لك المشدة على شان تسوي داخلها القات قال لي لا شكرا وفحط ومشي ,, والجني يدق عليا رديت عليه مالك يا جني اش قد في معك مشي انا قلت لك راعي لي ,, قال لي تا خرت يا عاقل قلت له قليل وبا أجي وأقول لك القصة قفل يا جني الله يرضى عليك معي خط ثاني قفل الجني ,, والي اتصلت بي واحده من الجيران تسألنا على المفتاح حق البيت على شان تسوي له نضافه قلت لها المفتاح عند الشحاري قالت الله يشلك ياكوكني بتتعبني الى عند الشحاري قلت لها اسمعي شوفينا معصب ألان مع ألسلامه قفلت الخط ,, وجلست ائشر بيدي أشوف سيارة او باص والحمد لله أشوف باص فار وأجي وشكله هدى السرعة قلت له معك وأنا فداء معك قال اركب يا عاقل ركبت معه وجلست داخل الفار والناس تتفرج عليا وساكتين وجلست جنب واحده وأول ما مشي الفار قالت لي البنت الي انا جلست جنبها يا عاقل بطل مدا حشة او با أهب لك بالجزمة قلت لها اواو مالك اش من مداحشة اسمعي وانا فدى لك صلحى الشنطه بيني وبينك وشوفينا شيبة ما عاد باقي معي غير اللسان وأنا عمك الكوكني وأنا عادنا ما خلصت قلت الكوكني سمعت الناس كلهم يصيحو قالو يا سواق نزلو هذا الكوكني ابو مافيش صاحب العطاس ,, وأنا صحت فيهم يا ناس بتجننو بي والله العظيم انا العطاس يكرهنا كره العمى ويوم يشوف أي موضوع اكتبه انا يجلس يتفل الشاشه قالو يا سواق نزلو او با ننزل نحنا هذا كذاب مثلهم ,, الحمد لله انه قدنا وصلت قريب مستشفي صابر والسواق جنب وقال لي انزل يا عاقل وادفع مية ريال قلت له خاف ربك والله انا مش صاحب العطاس ما صدقناش ,, نزلنو بالقوة وأنا رجل داخل الباص ورجل قدها بالشارع قلت بتاحف وأصلح نفسي سياسي محنك قلت لهم والله انا صاحب البيض البنت الي كانت جنبي جدلتنا بالجزمه قالت تفو عليك انت والبيض ,, نزلت من الباص وأنا مليان تفال وجلست امسح وجهي من التفال وتذكرت العطاس يوم يتفل الشاشه وجلست اضحك من قلبي بالبورت الي قدام مستشفي صابر وشوية واحده اجت وأنا جالس اضحك قالت لي مالك يا عاقل اش تبكي هي حسبت أننا جالس ابكي قلت لها لا وانا فداء لك بس جالس اضحك على الدنيا قالت لي من فين انته ياعاقل لأني اشتي اسالك انا سويت نفسي ابو العريف قلت لها انا العميد السعدي قالت لي انته العميد السعدي الي في الحراك قلت لها ايوه قالت لي هيه انقلع من قدامي لا أهب لك بالشنطه قلت لها طيب انا اضحك معك انا مش السعدي انا الفريق اول الكوكني ابو مافيش عادنا ماكلمت انطق لها الاسم وهي صاحت الحقوني يا مسلمين الشيبة هاذا جالس يهاوزني ,, واجو ثلاثه انفار دحابيش قالو لي مالك يا عاقل تهاوز البنت ما تسحتي على وجهك وشعرك قده ابيض وهي مثل بنتك قلت لها لا تصدقوها كذابة انا قلت لها انا الكوكني ابو مافيش وهي قامت تتبلى عليا وتصيح ,, قالو انته الكوكني قلت ايوة ,, وعيونكم ما تشوف غير النور شفت نفسي اطير والتلفون يرن وانا انضرب من الناس قلت لهم مالكم يا أخوان اش فيكم انا رجال كبير مثل أبوكم قالو نحن عسكر بالأمن المركزي ما خليتنا نعيد ,,, المهم ما عاد صحيت غير والممرضة في مستشفي صابر تقول لي اجت سلامات يا والد وما فيش بك حاجه غير رضوض وخدوش وكسر في الإصبع ,, وقلت لها يا بنتي أنا فداء لك شوفي لي كيف الأوضاع مع ألجماعه في الذنبة طلعو يافع او صلحو لهم دولة ثانية في ردفان ,, قالت الله يلعنك يا كوكني ومسكت أصبعي المكسورة وجلست تهس على أصبعي وأنا أصيح والناس سمعونا أصيح وقدهم عارفين أننا معور وأقول يا عالم ألحقونا والبنت تقول مله يا والد اش أسوي لك تحمل الألم وتقول لي بصوت منخفض خليني اشفي قليلي منكم يا الشيوبة لعبتم علينا لعب واذا مش خوف من الله با اكسر لك رجولك ,, دخل الدكتور رحمه من ربي وقال مالك يا والد تصيح اجيت انا با أجاوب على الدكتور قالت له ألممرضه لا ما فيش به حاجه بس من التضميد يتألم قال صلحي له إبرة والممرضة فرحت وكشرت أنيابها بالابره قلت له يادكتور خلاص قدنا بخير مشتيش ابرة اشتي الحق الجني مراعي لي في السوق ,, ربك انه الجني شافنا تاخرت واتصل بي قلت له الحقنا ياجني شوفنا في مستشفي صابر قال لي مالك اش رحت تشوف الجرحي قلت له لا انا قدنا جريح الحقنا بسرعة شوفنا في الطوارئ وبأهدى شكله لو شافنا با يصلح عليا فاتورة بمليون ريال قال لي الجني ياكوكني مالك حضك بلا مزح ألان فينك تا خرت عليا قلت له والله شوفنا في المستشفي في الطوارئ تعال بسرعة الجني ضحك وقال خلاص وأجي لك ألان دقائق بس شوية الممرضة تسوي لي تضميد ونست البالستر وانا استغليتها فرصه يوم هي قامت تجيب البالستر من الصيدلية شليت نفسي وخرجت من المستشفي وأشوف الجني وأجي قلت له يا جني لأعاد توقف ركبت معه وقلت له امشي بسرعة با هدي با يجي الان يدور عليا مشي الجني ويقول لي سلامات ياكوكني مالك اش فيك قلت له امشي مشت بطنك خرجنا من هنا بعدين با أقول لك الجني مشي بالسيارة تقول سيارة جيش شميت التواير حق السيارة إلى أذني صح انه الناس تشم بمناخيرها لكن انا من الضرب نخري ورمت رجعت أشم بأذوني ,, قال لي الجني مالك ياكوكني أش اصطلح بك هبيت له القصة وقلت له شوف الدنيا مشعله علينا وخليها على ربك من سوى الانقلاب هذا الناس جادمين لنا كروش قال اسمع يا كوكني الموضوع يشتي له تخزينه قلت له خاف ربك قدك تشوفنا مكسر وحالتي حاله تقول لي تخزينه قال لي لزم تخزن ياكوكني على شان تشتد وبنطلع انا وانته الذنبة ويافع بنشوف الموضوع أش ,, با نروح ألان نشتري قات ونرجع نخزن في ساحل أبين ونخطط كيف نصلح الأمور قلت له انا قدنا أرسلت السعدي يصلح الأمور,, قال الجني السعدي أجا يكحلها عماها ما عرف يحل الأمور انته السبب ياكوكني قلت له اش دخلنا انا كيف انا السبب وانته قدك تشوف الشعب كيف صلح بي قدك تشوفنا مكسر وحالتي حاله اسمع امشي امشي على السوق من صدق الموضوع يشتي له تخزينه القات عليك يا جني انا الفلوس حقي انسرقت يوم ضربونا الأمن المركزي سرقو عليا الفلوس زعلانين قالو ما خليتهم يعيدون ,,, وصلنا سوق القات ونزل الجني يشتري القات وأنا جالس بالسيارة وجات صومالية تشتي مني حق الغداء وقالت لي الله يفتح عليك أعطيني لله شوف أني بدون غداء قلت لها الله كريم شوفينا مافيش معي حاجة ماباقيش معي غير لساني قالت الله يقطعها عليك على شان يكون مافيش معك حاجه معك جوال أيفون وسيارة مونيكا وما تهب لي حق الغداء يا شيبة يا مخرف انا رفعت الزجاج على شان ما تجلس الصومالية تدعي عليا وقليل وجاني الجني مثل الجني يتقفز فرحان بالقات ومعه خبر ثاني قال لي ياكوكني أبشرك الجماعة اصدرو بيان من الذنبة ,, قلت له مالك يا جني أش الخبر هذا قال لي والله شوفهم ألان نزلو البيان في منتديات الضالع اتصل الى عند أي واحد وتأكد لو مش مصدقنا قلت له يا جني مصدقك بس أكيد البيان نفس حق يافع قال لي لا على حسب ما قال لي صاحبي ألي نزله مقرطس انه البيان ثاني مش نفسه الي في يافع ,, انا قدنا كنت عارف لكن سويت نفسي مش عارف ,, قلت له يا جني مالك كيف مش نفسه وقده البيان متفقين عليه ,, قال لي الجني لا هذه المرة ضحكنا على أصحاب ,, جلسنا نعد نحن وهم البيان في الأخير قلنا لهم الاختلاف ظاهره صحية ,, قلت له كيف يا جني مالك عيب عليك أش من كلام هذا قال والله الجماعة راحو يافع جلسو ياكلو لحم ويشربو مرق ويشخطو اتفاقيات وفي الأخير اللعب من عند صاحبك ياكوكني مش من عند أصحاب يافع قلت له مين صاحبي يا جني قال لي قدك عارف ياكوكني وانا عارف تضحك عليا قلت له صاحبي مؤيد لبيان يافع قال لي الجني صاحبك ضحك عليك ياكوكني اذا كان مؤيد او مازال مؤيد لبيان يافع يشخط بيان من عنده على شان أبين لك يا كوكني انه صاحبك اخرطي قلت له اسمع يا جني الموضوع يشتي له تخزينه روينا أش من قات جبت ,,, اجيت أمد يدي للكيس حق القات حصلته قات يا فعي قلت له كيف يا جني بنخزن قات يا فعي ونحنا فركنا بأصحاب يافع وبينا وبينهم تاريخ كبير ميات السنين عمرنا ما اختلفنا على شئ ,,, قال الجني يا رجال خزن الجماعة قدهم جلسو في يافع آكلين شاربين ومتفقين ووقعو على البيان وفي الأخير قالو بيان يافع غير معترف فيه خزن الله يلعنك قده القات بفلوسنا مش من احد ,, قلت له يا جني يعني يجوز نخزن بفلوسنا والله صح يا جني على قولتك القات بفلوسنا المشكلة بالناس الي أكلت عيش وملح وتفلت عليه بالأخير لكن نحنا على قولتك قده قات بفلوسنا ,, اقرع سلف يا جني وخلينا نروح على ساحل أبين ,, مشينا وأنا حطيت أول عود قات في لقفي وأنا اونون وأفكر واقلبها يمينن وشمال وطست قليل على الجني وسمعته يصيح ياكوكني شفت الي شفت انا قلت له مالك تصيح انا كنت أفكر قال شفت البنات الي جزعنا من جنبهم قلت له لا ما شفتهم قال كانو ياشرو علينا با أدور لهم ياكوكني يمكن يكونو معروفين معنا في الحراك قلت له يا جني اسمع انا قدنا مكسر مدقدق ما فيش بي طافه على الكلام با تمشي او با أهب لك كف الين اخليك تدور ودينا الساحل يالله مشينا ووقفنا عند سوبر ماركت ضمران نشتري سيجارة ومي بارد والسي كولا نزل الجني يشتري وانا جلست فوق السيارة واجيت اتصل على السعدي اسأله اش حصل حصلت تلفونه مغلق خارج التغطية أجا الجني يصيح قال ياكوكني ما حصلت كندا حصلت السي كولاء من حق العيسائي قلت له أنا ممتاز نشجع الصناعات حقنا المحلية اقل شئ الفائدة نحصل منها شئ فائدة مصنع الشراب حق العيسائي يمكن يساهم في علاج مريض او جريح او محتاج قال لي الجني اغسل يدك ياكوكني ألان خلاص أصحاب يافع انجرحو من الذي صار وصدقنا الان با تتأزم الأمور وما بتحصل حتى الالسي كولاء العيسائي با يصدرها الى تعز ,, قلت له يا جني بطل بطل مناجمه انته تشتي توسع الخلاف وتشتي تثير المشاكل بين الإخوة وعيال العم قال لي يا كوكني انتظر كم يوم وبا تشوف كيف با تكبر المشاكل ,, قلت له انا شوف يا حبيبي اذا عادها المشاكل با تكبر وانا قدنا ألان بديت أحط أول عود من القات اليافعي شوف اذا قرح معي القات وقدنا في نص القات وحسبت الأمور با تتوتر با أعلن الكفاح المسلح وخليها تحبل بربح ,, قال الجني ياكوكني مالك اش اثر فيك القات اليافعي مثل الجماعة بعد ما وقعو على كل الوثائق قالو انها لا تخدم القضية الجنوبية واعتبروها خروج عن الإجماع ,, يا جني اسمع شوف لنا دحباشي يخزن معانا على شان نهب له القصة ونعرف من فين الخلل ونجرجرة في الكلام ونعرف ليش الانقلاب على بيان يافع لأنه أنا إلى ألان ما آفتهم لي كيف صحلو الجماعة ,, قال لي الجني ياكوكني معي دحباشي صاحبي من الجحملية ينفع نستشيره قلت له تمام انا فداء ربك هاتو هذا وقته با نستفيد من أخوانا أصحاب خينا ,, الجني قال لي ياكوكني ألان انا خزنتك وعادك تشتينا أجيب الرجال من فين أجيب له قات قلت له يا جني قدم فلوس ,, قدها من فلوس الحزب الاشتراكي من حق تأجير الجامعة قال لي الجني ياكوكني في عينك عود تحسدنا على كم قرش نحصلها ,, المهم طلع الجني جواله واتصل بصاحبة وقاله الجني شليت قات او عادك قبل لا يقول له السلام عليكم قاله الرجال يا ابن عمي من اين مافيش معي حق القات قال له الجني طيب السلام عليكم تشتي تخزن با أخزنك اليوم قال له طيب مافيش مشكلة فينك با أجي لك قال له الجني ألان نحن في ساحل أبين شل لك الفين ريال من أي واحد جنبك ألان وجيب قاتك معك وأنا با أحاسبك ,, المهم قفل الجني التلفون وانا قلت له يا جني اسمع لا تقول له انه انا الكوكني ابو مافيش شوفنا قدنا مربط ومخربش كثير قوله هذا واحد من الجماعة أجا من البلاد من أصحابنا انتبه شوفنا أخاف من أصحاب تعز ,, قال لي الجني ياكوكني لا تخاف ,, جلسنا نهدر قليل ونسمع أغنية والرجال وصل صاحب تعز وسلم علينا وجلسنا نسأله عن الإخبار وكيف العيال وبعدين دخلنا في الموضوع ,, وقام الجني يهب لصاحب تعز الموضوع ,, صاحب تعز جلس يفكر ويقلب الموضوع يمكن ساعة وهو ساكت ولا قال كلمه وأنا كل قليل أتفرج على الجني واغمز له وأقول له بصوت واطي لأنه مدكي جنبي قلت له خسرت ألفين ريال على الكرتون هذا من فين جبته وعادك تقول لي هذا الداهية حق الجحملية قال لي ياكوكني اصبر خلي الرجال يفكر ,, قلت له يا جني لو قده الموضوع فيه الفين ريال كنت شلينا كبش ورحنا عند واحد يقرءا الكف في الحسوه كان با يقول لنا الموضوع كامل أش الطبخة عادنا با اخلص كلامي وصاحب الجحملية يقول احم احم اسمعو مو شقول لكم ,,, قال خينا أصحابكم كلهم كراتين أصحاب يافع وردفان قلت له أنا لمو يا اب عمي وزعلت عليهم أنا لأننا أحبهم والجني جلس يفحر ضحك قلت له لزم توضح لنا كيف كراتين قال كراتين لأنهم زادو عليهم وقدهم عارفين من زاد عليهم ,, أنا قمت وقلت للجني الله ياخذك يا جني انته والمستشار حقك قوله يروح ألان او قدنا طفشان با أقرح له رأسه وحكم الله نكتب انه شهيد من تعز المهم مشي الرجال وأنا قلت للجني اسمع يا جني شوفنا تعبان من الضرب والتفل الي حصل لي روحنا البيت قال لي تمام وصلنا الجني إلى الحافة واجيت والحافة مليانه والناس مرصوصين في الأركان ونزلت من السيارة وصيحت يا شباب تعالو شوفنا تعورت ,, اجو كلهم يقولو لي سلامات يا عمو اش تضاربت مع احد واسمع صاحبتي الي أول قالت اننا رايح اهاوز قالت اكيد الكوكني قفز حوش وحصل له ضرب قلت لها أعقلي شوفي يوم خرجت أول وشفتك اصطلح بي حادث بالطريق من صورتك الدبور الله يخس اليوم الي سكنتي عندنا بالحافة ,, شلونا العيال الى البيت وطلعونا الدرج ,, واجيت فرشت فراشي أشتي ارقد وجالس أتقلب وأنا أتقلب تذكرت كلام صاحب الجحملية يوم قال كل أصحابكم كراتين وجلست اقلبها يمين وشمال ويسار وشربت باكتين دخان وما حصلت أي جابه ألان اشتيكم تفكرون معي أش يقصد صاحب الجحملية على شان ارقد أنا لأننا بدون نوم ,, 
|
|
#4
12-24-2010, 03:42 AM
|
|||||||||||||||||||||||
|
|||||||||||||||||||||||
حياك الله يا ابو قاهد
|
|
#5
12-24-2010, 03:47 AM
|
|||||||||||||||||||||||
|
|||||||||||||||||||||||
اذا جاوبت عليك بنفس اسلوبك با اكون بلطجي مثلك او ابن سوق ,, لكل انسان لسان ,, واذا جاوبت عليك بلساني بخليك ما تسوى قيد بقرة او حبة فصفص ,, شفت كيف الموضوع يا ولدي وانا عمك يالله قوم خذ لك دش حبيبي ونام وصلح بودر قبل ماترقد لانه الدنيا حر وحمى والحمى يسبب لك حكه وانتة راقد اذا تريد الحكه هذه تروح عليك وعلى البودر ,, على فكره شوفنا تغسلت يعني مش نجس انا ما احب اجلس نجس كثير واذا مش مصدقنا اسالها ,, شالوم يا صغيري لا تنسي تحط حفاظة ,, ككككككككككككك
|
|
#7
12-25-2010, 12:40 PM
|
|||||||||||||||||||||||
|
|||||||||||||||||||||||
الأخ/حضرمي وبس أنصحك تمسك أعصابك نحن لانجتمع هنا لنسمع سبك وشتمك للأعضاء من شق وطرف ولاتنسى أنك مجرد عضو مثلنا .. يعني مش نبي مرسل ولا ملك منزل وإذا مامسكت أعصابك .. فإيقافك أمر لابد منه
|
|
«
الموضوع السابق
|
الموضوع التالي
»
العرض العادي
|
|
الساعة الآن 04:50 AM.