[روابي الجنوب]

جمال خضر الطفي
قال الجنوبي ياعدن أيش السبب
تتربعي ع العرش ذي قدهو خراب
قالت حفاظي ع الاصاله والنسب
والعلم والتاريخ ذي جا بالكتاب
قلت السلامه لش زمان اول ذهب
في عاصفه وعصار قد ولا وغاب
شاتجملين اليوم من كثر الطلب
من بعد مابين لش المطلب سراب
قالت حباك الرب في أعلى الرُتب
ماهو كلامك ذا ولاهو لك خطاب
ويش الذي غيّر كلامك والخُطب
ذي كنت تتزمل بها حل الطُلاب
قلت الصراحه مل قلبي ونتحب
من صمت أصحابي على فعل الكلاب
كم صحت لما جاوب الصوت الشحب
ياناس محد رد لي منهم جوااااب
قالت عجيبي يا ابو يوسف عجب
ما ببصرك سويت شي غير العتاب
ماشي كفاك الدم سيّل وستكب
ولا ملايين اقبله شيبه وشاب
قلت الكفايه لاتشبين الحطب
ولاتزيديني مواجع واكتئاب
قدنا من الغربه بهمي والتعب
والذل ذي فيها يكفي والعذاب
اتبسمت نحوي وقالت في ادب
وعيانها بالدمع تسبق بالجواب
لمه كذا ونته عروقي والعصب
سبيتني عند الحداحد والغراب
ويش الذي خلا ابو يوسف هرب
من عشرتي ويعيش ما بين الذياب
ما عشت اني في خير من بعد اغترب
ولاهو قد اتهنى بقوته والشراب
واليوم يشتي حريه من ذي كتب
كنه بيحسبها كما اكل الكباب
قلنا فداش الروح لاتسبين سب
حلمش قد الأسرار من تحت الحجاب
لعا نذكر الماضي قد المبعد قرب
واتعرفين العهد لاحان الإياب