[العبد لله بو صالح]

التناهيد

رسيت القطب في الجبح مابارد منه انا انسان دابس
وانتم جهزو ستميه من حاملين السلب او الف فارس
وبصر الله يقع موت عن الجبح والا عسل صافي ومصبوب
مكانه جبحكم ياآل باكرمان فيه العسل ماغبه النوب

وسوو ماتسوون بي او عاكسو الزمن كله معاكس
وثيروها على الجبح حمرا مثل ماثارت الغبراء وداحس
وانا باقول ياحول لاقد شفت كير البلاء لاصي ومشبوب
مكانه جبحكم ياآل باكرمان فيه العسل ماغبه النوب

اذا جديت وظهرت هذا جاء يفاخر وهذا جاء ينافس
وان غضيت وصبرت قالو مامعه مقدره مسكين يائس
منين الياس مادام انا لي ساق عالمشي يحملنا وعرقوب
مكانه جبحكم ياآل باكرمان فيه العسل ماغبه النوب

انا راغب وحبان وكل ما جيت باقايس الحب ماتقايس
انا مشتاق والشوق قد له نار تاكل خضر مره ويابس
اذا هاجت في القلب خلتن مشي عالوعر من غير مركوب
مكانه جبحكم ياآل باكرمان فيه العسل ماغبه النوب